Heimilisfang: Árbraut 31, 540 Blönduós
Sími: 452-4030
Netfang: textilmidstod@textilmidstod.is
Heimasíða: www.textilmidstod.is
Textílmiðstöð Íslands er staðsett í fögru umhverfi í sögufrægri byggingu, Kvennaskólanum á Blönduósi.
Textílmiðstöðin er miðstöð öflugrar rannsóknar- og þróunarstarfssemi í textíl og sköpunarver ("creative hub"). Lögð er áhersla á nýsköpunar-, þróunar- og samstarfsverkefni sem stuðla að atvinnuuppbyggingu í tengslum við textíl og hringrásarhagkerfi. Jafnframt sinnir Textílmiðstöðin því hlutverki að bjóða upp á aðstöðu fyrir próftöku í samstarfi við Húnabyggð og aðila háskóla og símenntunarstöðva.
Starfsemi Textílmiðstöðvar byggir á samningi við Menningar-, nýsköpunar- og háskólaráðuneytið. Þann 22. apríl 2020 voru formlega stofnuð Samtök þekkingarsetra (SÞS) sem Textílmiðstöð Íslands er aðili að. Um er að ræða netverk þekkingarsetra á landsbyggðinni. Meðal samningsbundinna verkefna setranna eru rannsóknir og þróun til eflingar byggðar, þjónusta við háskólanema, miðlun þekkingar sem og efling nýsköpunar, atvinnu og samfélagsþróunar.
Ós Textíllistamiðstöð hefur verið starfrækt í Kvennaskólanum síðan 2013. Ós er ætluð listafólki, fræðafólki og hönnuðum sem vinna með textíl. Dvölin í listamiðstöðinni er að lágmarki einn mánuður en geta verið fleiri. Boðið er upp á gisti- og vinnuaðstöðu fyrir allt að 14 einstaklinga. Listafólkið fær m.a. kynningu á Ullarþvottastöð Ístex og Heimilisiðnaðarsafninu á Blönduósi. Hægt er að sækja um dvöl í listamiðstöðinni hvenær sem er ("open call") á heimasíðu www.textilmidstod.is.
TextílLab er rými á vegum Textílmiðstöðvarinnar sem er útbúin stafrænum tækjum sem tengjast textílvinnslu: vefnaði, prjóni, þæfingu og útsaumi. Ekki þarf sérstaka reynslu eða fullkláraða verkefnahugmynd til að nýta sér aðstöðina. TextílLab er opið öllum og hentar handavinnufólki, fræðimönnum, listamönnum, nemendum, eða bara öllum sem hafa áhuga á að þróa verkefni eða vöru og gera tilraunir með efni.
