Ársreikningur Húnabyggðar 2025
Ársreikningur Húnabyggðar fyrir árið 2025 tekinn til seinni umræðu í sveitarstjórn Húnabyggðar fimmtudaginn 7. maí. Þorsteinn G. Þorsteinsson endurskoðandi hjá KPMG fór yfir samstæðureikning sveitarfélagsins, ásamt sundurliðunarbók á fundinum. Að því loknu svaraði hann fyrirspurnum sveitarstjórnarmanna. Ársreikningur Húnabyggðar 2025 var samþykktur samhljóða í sveitarstjórn.
Bókun sveitarstjórnar vegna ársreiknings 2025 var eftirfarandi:
Ársreikningur Húnabyggðar fyrir árið 2025 var lagður fram til annarrar umræðu í sveitarstjórn 7. maí.
Árið 2025 var þriðja heila árið sem sveitarfélagið er rekið fjárhagslega sem eitt sveitarfélag og á árinu urðu umtalsverðar breytingar á rekstrinum vegna slita þriggja byggðarsamlaga um atvinnu- og menningarmál, félags- og skólaþjónustu og tónlistarskóla.
Hagnaður ársins nam rúmum 86 milljónum króna en áætlun hljóðaði upp á um tæplega 101 milljón króna hagnað. Þetta er mjög viðunandi niðurstaða og sögulega ein af bestu niðurstöðum þeirra sveitarfélaga sem nú mynda Húnabyggð.
Heildartekjur námu rúmlega 3,1 milljarði króna og hafa þær vaxið um tæp 8% á milli ára. Heildargjöld námu 2,75 milljörðum króna og hafa þau vaxið um 15% á milli ára. Rekstrarhagnaður fyrir afskriftir (EBITDA) er um 413 milljónir króna og lækkaði um rúmar 126 milljónir milli ára í krónutölu. EBITDA hlutfall er nú 13%, en var 18,4% árið 2024.
Veltufé frá rekstri var rúmlega 306 milljónir en áætlunin hljóðaði upp á 253 milljónir. Veltufé frá rekstri heldur áfram að aukast í krónutölu og er nú 9,7% af rekstrartekjum.
Það er traustvekjandi að þessir lykilmælikvarðar séu á réttum stað sem sýnir að stjórn rekstursins er á góðum stað.
Efnahagur nam rúmum 5,5 milljörðum og þar af eru fastafjármunir rúmlega 4,6 milljarðar en veltufé 622 milljónir. Eigið fé nam tæpum 1,7 milljarði eða sem gerir 30,3% eiginfjárhlutfall. Skuldir námu rúmum 3,8 milljörðum og skammtímaskuldir voru þar af 609 milljónir og veltufjárhlutfall því 1,02.
Fjárfestingar í rekstrarfjármunum námu 422 milljónum sem eru að lang mestu leiti verkefni tengd uppbyggingu grunninnviða. Fjármögnunarhreyfingar námu um tæpum 92 milljónum og voru í samræmi við áætlun.
Laun og launatengd gjöld sem hlutfall af rekstrartekjum er nú 48,2%, en voru 46,9% árið 2024. Annar rekstrarkostnaður sem hlutfall af rekstrartekjum er nú 38,7%, en voru 34,7% árið 2024.
Niðurstaða ársins 2025 er mjög jákvæð og áframhaldandi jákvæð þróun allra lykilmælikvarða sveitarfélagsins er skýrt dæmi um að reksturinn er góður. Sú góða þróun sem hefur verið á síðustu þremur árum heldur því áfram og sveitarfélagið er nú komið í ágætis stöðu fjárhagslega til að takast á við verkefni sín.
Á árinu 2025 tókst að halda áfram að sækja því umfang fjárfestingaverkefna var hátt og yfirstandandi kjörtímabil er það hæsta hingað til hvað varðar fjárfestingar eða 1.381 milljónir.
Enn eru áskoranir framundan og vinnu við endurskipulagningu sveitarfélagsins eftir sameiningarnar 2022 og 2024 er ekki lokið. Við það bætist slit byggðarsamlaganna sem er flókið og umfangsmikið verkefni. Vinnan við að gera sveitarfélagið fjárhagslega sjálfbært heldur því áfram og miðar vel.
Sveitarstjórn vill nota tækifærið og þakka starfsfólki Húnabyggðar fyrir frábæra vinnu og góð störf á síðustu árum sem hafa verið krefjandi t.d. vegna álags sem fylgt hefur sameiningum sveitarfélaganna og endurskipulagningu fjármála og starfsemi sveitarfélagsins.
Forseti bar upp bókun vegna ársreiknings Húnabyggðar 2025 til samþykktar, sem sveitarstjórn samþykkti með fimm atkvæðum Guðmundar Hauks Jakbossonar, Auðuns Steins Sigurðssonar, Ragnhildar Haraldsdóttur, Zophoníasar Ara Lárussonar og Ásdísar Ýrar Arnardóttur.
Sverrir Þór Sverrisson, Elín Aradóttir, Grímur Rúnar Lárusson og Jón Gíslason sátu hjá.
