Grímur Rúnar Lárusson, formaður nefndarinnar, bauð fundarmenn velkomna til fjórtánda fundar í Íþrótta-, tómstunda- og lýðheilsunefnd Húnabyggðar.
Gengið var til dagskrár.
Dagskrá:
- Sumarfjör sumarið 2026
Kristín Ingibjörg Lárusdóttir, menningar-, íþrótta- og tómstundafulltrúi Húnabyggðar mætti á fundinn og kynnti Sumarfjör í Húnabyggð sumarið 2026. Kristín greindi frá því að hún væri búin að manna Sumarfjörið í sumar í samvinnu við velferðarsvið Húnabyggðar. Fyrirkomulagið á Sumarfjöri í sumar verður með svipuðu sniði og í fyrra. Fyrirhugað er að Sumarfjörið byrji mánudaginn 8. júní nk. og ljúki fimmtudaginn 16. júlí nk.
Dagskrá og skráning í Sumarfjör verður kynnt á samfélagsmiðlum sveitarfélagsins um miðjan maí nk.
Lagt fram til kynningar.
- 2402034 - Skjólið – starfið
Kristín Ingibjörg Lárusdóttir, menningar-, íþrótta- og tómstundafulltrúi Húnabyggðar, mætti á fundinn undir þessum lið og fór yfir starfið í félagsmiðstöðinni í vetur. Aðsókn í Skjólið í vetur hefur verið með fínasta móti. Tveir starfsmenn hafa unnið í dagopnun Skjólsins og sex starfsmenn hafa verið í tímavinnu á kvöldin í vetur.
Kristín fór yfir að Landsmót Samfés hefði verið haldið í Húnabyggð helgina 3.-5. október sl. þar sem um 400 ungmenni mættu ásamt starfsfólki. Landsmótið fór vel fram og hafði mjög jákvæð áhrif á samfélagið hér í Húnabyggð.
Lagt fram til kynningar.
- 2504020 - Framlög til verkefna á sviði almenningssamgangna
Kristín Ingibjörg Lárusdóttir, menningar-, íþrótta- og tómstundafulltrúi Húnabyggðar, mætti á fundinn undir þessum lið og kynnti áætlanir um nýtingu styrks sem Húnabyggð fékk á haustmánuðum á grundvelli stefnumótandi byggðaáætlunar fyrir árin 2022-2036 vegna verkefna sem tengjast aðgerð A. 10 Almenningssamgöngur á milli byggða. Hugmyndir eru um að börn í dreifbýli fái akstur heim úr félagsmiðstöð eitt kvöld í viku á fyrir fram ákveðnar stoppistöðvar. Á næstu vikum verður sett af stað tilraunaverkefni vegna þessa. Verið er að kortleggja leiðir og á næstu vikum verður hugmyndin kynnt fyrir foreldrum barna í 8.-10. bekk í dreifbýli Húnabyggðar. Aukinheldur verði lögð könnun fyrir þau um fyrirkomulag akstursins. Umræður urðu á fundinum um málið og tekur nefndin jákvætt í verkefnið.
Þá hefur Innviðaráðherra auglýst eftir umsóknum um framlög sem veitt eru á grundvelli stefnumótandi byggðaáætlunar fyrir árin 2022-2036 vegna verkefna sem tengjast aðgerð A. 10 Almenningssamgöngur á milli byggða. Við forgangsröðun umsókna verður litið til verkefna sem m.a. auka möguleika ungs fólks á dreifbýlum svæðum til að sækja íþrótta- og menningarstarfsemi.
Hugmyndir eru uppi um að Húnabyggð sæki að nýju um framlag og þá vegna aksturs í íþrótta-, tómstunda-, og fræðslustarfsemi á Sauðárkróki fyrir íbúa Húnabyggðar. Nefndin felur menningar-, íþrótta- og tómstundafulltrúa Húnabyggðar að útfæra hugmyndina nánar og sækja um framlag.
- 2206034 - Önnur mál
Engin önnur mál lágu fyrir fundinum.
